Gjuajtje vdekjeprurëse në aeroportin e Kabulit, një i vrarë dhe tre të plagosur

11:13 | 23 Gusht 2021
arbresh.info

Forcat e sigurisë perëndimore u përfshinë në një shkëmbim zjarri me persona të armatosur të paidentifikuar të hënën në aeroportin e Kabulit, ndërsa Presidenti amerikan Joe Biden u përpoq të shpejtonte evakuimin kaotik të dhjetëra mijëra njerëzve nga Afganistani i kontrolluar nga talebanët, raporton AFP.

Një afgan u vra dhe tre të tjerë u plagosën në një përleshje zjarri në agim që sipas ushtrisë gjermane shpërtheu midis rojeve afgane dhe sulmuesve të panjohur.

Trupat gjermane dhe amerikane “morën pjesë në shkëmbimin e mëtejshëm të zjarrit”, tha ushtria gjermane në një deklaratë, transmeton arbresh.info.

Ky ishte episodi i fundit në një operacion kaotik të mbikëqyrur nga ushtria amerikane që ka parë rreth 30,000 njerëz të evakuuar nga Afganistani që kur talebanët marshuan në Kabul më 15 gusht, duke marrë kontrollin efektiv të vendit./arbresh.info/